Barangay Love Stories - Giah Part 2

Noong mag-round ang doctor, sinabi nitong bukas ng umaga ay puwede nang lumabas si Mark. Nakakakain na kasi si Mark noon pero nanghihina pa. Sa tuwing hawak ni Mark ang CP niya, nakakaramdam ako ng galit. Iniisip kong si Margie nanaman ang ka-text niya. Gusto kong magalit sa kaniya pero pinigil ko ang sarili ko. Itinago ko na lang ang galit ko dahil sabi ko sa sarili ko, tama na.



Naisip ko kasi, bata pa ako. 21 years old lang ako noon at marami pang mangyayari sa buhay ko. Marami pa akong makikilala. Makakakita pa ako ng ibang lalaking hindi kagaya ni Mark. Hindi kagaya ni Papa na hindi kuntento sa isa. Masakit isipin na maghihiwalay na kami na Mark kasi ‘yun talaga ang plano ko, ang palayain na siya pag-uwi namin ng boardinghouse. Kaya hindi na ako nagpakita ng galit sa kaniya o pagtatampo. Nagpabait ako sa kaniya. Nagpakabuti ako sa pagaalaga sa kaniya sa ospital kasi,..iyon na huling pagkakataong pakikitaan ko siya ng kabutihan.....................